Horfni jóladrumburinn

Ég veit ekki alveg hvað þetta er með mig og Fréttablaðið - en þetta er í annað skipti á stuttum tíma sem ég læt þau fá uppskrift og síðan birtist uppskriftin ekki, heldur bara viðtalið/pistillinn sem henni fylgdi. Ég veit að mér hættir til að skrifa of langar greinar en átti nú ekki von á að styttingar yrðu einfaldlega í því formi að uppskriftin væri klippt aftan af ...

Allavega, hér er jóladrumbsuppskriftin:

Franskur jóladrumbur

Svampbotn:
6 meðalstór egg, aðskilin
160 g sykur
1 ½ tsk vanilludropar
¼ tsk salt
50 g kakóduft

Ofninn hitaður í 200°C og ofnskúffa klædd með bökunarpappír. Eggjarauðurnar þeyttar mjög vel með 110 g af sykrinum – 5 mínútur í hrærivél, lengur með aflminni þeytara. Vanilludropum og salti þeytt saman við og síðan er kakóduftið sigtað yfir og blandað gætilega saman við með sleikju. Eggjahvíturnar hálfþeyttar, 50 g af sykri blandað saman við og þeytt áfram þar til hvíturnar mynda stífa toppa. Blandað gætilega saman við kakódeigið með sleikju og síðan er deiginu dreift jafnt í ofnskúffuna og botninn bakaður ofarlega í ofni í um 10 mínútur. Hvolft á bökunarpappírsörk og pappírinn sem botninn var bakaður á losaður gætilega áður en kakan kólnar alveg.

Fylling:
350 ml matreiðslurjómi
200 g sýrður rjómi (18%)
1 msk kakóduft
1 pakki Royal súkkulaðibúðingsduft

Allt sett í skál og þeytt saman. Látið bíða í 1-2 mínútur, eða þar til blandan fer að þykkna. Þá er henni hellt á rúllutertubotninn, smurt jafnt yfir og síðan er tertunni rúllað upp frá annarri langhliðinni. Bökunarpappír vafið utan um og tertan kæld vel.

Súkkulaðismjörkrem:
150 g suðusúkkulaði
150 g smjör, lint
225 g flórsykur
4 eggjarauður
2 tsk vanillusykur

Súkkulaðið brætt í vatnsbaði og látið kólna dálítið. Smjör, flórsykur, eggjarauður og vanillusykur hrært vel saman og síðan er súkkulaðinu hrært saman við. Endarnir skornir af rúllutertunni á ská og festir á hana eins og kvistir með dálitlu smjörkremi. Síðan er kreminu smurt jafnt á tertuna (og kvistina) og gaffall dreginn eftir endilangri tertunni fram og aftur til að gera barkarmynstur. Skreytt eftir smekk og flórsykri e.t.v. stráð yfir.